Abraham Maslow-imuna oqaatiginikuusaa eqqarsaatigerujooriga.

"In any given moment we have two options:

to step forward into growth or to step back into safety."

"Qaqugukkulluunniit marlunnik toqqagassaqarpugut:

ineriartornerup tungaanukarluta toqqissisimanermiillutaluunniit."

Maslow nalugukku kinaanersoq tarnip pissusaanik ilisimatuujuvoq.

Taassumallu sananikuuaa qallunaatut atilik: Maslow's behovspyramide.

Pisariaqartitanut pyramideq.

Siullertut timitta pisariaqartitai soorlu: Silaannaq (anersaartorneq), nerineq, quineq, anarneq,

atisaqarneq, sininneq, angerlarsimaffeqarneq, atoqatigiinneq ilaallu ilanngullugit.

Taakku pereeraangata pisariaqartitap tullianut ingerlaqqittarpugut, tullinnguupporlu toqqissisimanermik pisariaqartitsineq: suliffeqarneq, peqqinneq, inuttut isumannaatsumiinnissaq, pissarititanik peqarneq, illuuteqarneq ilaallu ilanngullugit.

Toqqissisimaneq pereeraangatsigu asanninneq ataqatigiissuserlu pisariaqartilertarpagut soorlu:

ikinngutigiinnerit, qanilaassuseq, ilaquttat, arlaannik ilaasutut misigineq ilaallu ilanngullugit.

Taakku pereeraangatsigit imminut naleqartinnissamik pisariaqartitat perusulertarpagut soorlu:

ataqqineqarneq, imminut naleqartinneq, naleqartinneqarneq, ilisarisimalerneqarneq, nukittussuseq, kiffaanngissuseq allallu.

Maslow-ip pyramideliamini qullerpaatikkamiuk - Self-Actualization. Qallunaatut selv realiseringimik taaneqartoq.

Kalaallisut nassuiaruminaappoq qanoq pisariaqartitap kingulliip nutsernissaa, kisianni imatut oqaatigisinnaavara: kinaassutsip piginnaasallu tamakkiisumik piviusunngortinnerat.

Assersuusiorsinnaavunga soorlu suliassavissuup suliarinera. Soorlu Messi arsarneq atorlugu self-actualization anguaa, Einstein-ip fysikki atorlugu suliassavissuani suliarivaa.

Rasmus Lyberth nipilersornikkut qalipaanikkullu.

Self-actualiazation anguneqarsinnaavoq soorlu nipilersornikkut, eqqumiitsuliornikkut, politikkernikkut, soorlu Jonathan Motzfeldt allallu politikkikkut tamanna angunikuugaat.

Oqaatigineqartarpoq tamatsinnooqqissaartoqartoq. Suliassavissuaqartugut.

Tamannalu angussagutsigu ineriartorneq toqqartariaqarparput.

Toqqissisimaffitsinniit anigutta ineriartornerup tungaanut ingerlagutta suliassavissuatta tungaanut ingerlassaagut.

Soorlu misigissuseq sofamiilluni toqqissisimanarpoq, kisianni timersorneq toqqaraanni ineriartornermik toqqaaneruvoq.

Uanga nammineq nassuerutigissavara timersornerup tungaatigut aamma toqqissisimaneq toqqartarakku ineriartortinngitsoortarpara. Kisianni aprilimi piginnaasakka inerisarlugit ilinnialerpunga.

Tamanna aamma toqqissisimaffimmiit anineruvoq ineriartornerullu tungaanut ingerlanerulluni.

Aallaqqaammut taanna piginnaasaq ilinniarnerani nalorsuaarpunga.

Qerisaqattaartarlunga. Kisianni oqaatigineqartarpoq mastereq, tassa pikkorisseruloornikoq aamma nutaraanikuummat.

Aallutiinnaramiuk masterinngornikoq. Masterinngorneq aamma Maslow-ip pisariaqatitanut pyramideani qullerpaamiippoq.

Kisianni Maslow-i toqulerluni pyramideq taanna inerisaqqinnikuuaa - pisortatigoortumillu atuutilernikuunngilaq, qullerpaanngortillugu: Self-transcendence. Namminermiit annertunermik suliaqarneq.

Soorlu imminut piunnaarluni nunarsuarmut tunniussineq.

Ullormut allatara taamaaqili. Suliassavissuarput suliarissagutsigu ineriartornerup tungaanut ingerlasariaqarpugut.