Facebookkimi siaruarterneqarnikooqimmat uangalu facebookkeerunnikuullunga - maana ikkutilaaqaara.

Arne-Jørgen 1990-imi inunngorpoq qatanngutigiinni pingasuni nukarliuvoq.

Angajoqqaavi imerajuttuupput ikiaroortarlutillu.

Qatanngutai ukiuni pingasuni sisamanillu angajulliupput. Arne-p meeraanera tamaat angajoqqaavi atuisimapput.
Qatanngutini angujulliit assigerusussimavai, maliinnaavittarlugillu.

Ilaluarisaalaartaraluarluni nukarliugami.

Qatanngutai inuusuttuaranngormata misilittaaniakujuttalerput.

Meeraatigaluni akuuffigisarpai, qulinillu ukioqarluni aalakooqqaarpoq, silaarulluni politiiniit aatissimalluni angerlaatsilluni.

11-inik ukioqarluni ikiarooqqaarpoq, qatanngutai ikiaroorniakujuttalersimammata.

12-inik ukioqarluni Ilulissanut nuupput anaanaa ilinniariarmat.

Tamannalu inuuneranut allannguingaatsiarpoq allaat ullumi inuuneranut sunniuteqarluni.

Taamanikkut Arne innaleraangami ikiaroornartumik millusseqqaartarsimavoq sinilluarsaatigisaramiuk.

Siullermik angajuni kammai kammagisarpai, Ilulissanulli nuukkamik angujuni aqqutiginagit nammineq peqatipajaaminik kammaqartalersimavoq.

Ilulissaniinnermini peqatini ilagisalerpai.

Peqatai hashimik gassimik imigassanik tupanillu atuisuunngillat.

Paasilersimavaalu nammineq siusippallaartumik misileraasimalluni.

Pissutaavoq angajulliunernik angajoqarami.

Piffissap ingerlanerani takulersimavaa qatanngutini maliinnaraluarunigit assigisussaallugit, klassimik ataatsimik marlunnilluunniit kinguartitaasut…

Ikiaruuginnaavissut ulloq unnuarlu.

Meeraanini tamaat assigerusuttarnikuullugit 12-inik ukioqarluni pisorujoorluni Ilulissaniinnermini aaliangerpoq qatanngutini malikkunnaartariaqarlugit.

Nammineq aqqutini ujartulersimavaa.

Aaliangerlunilu iliuusai akerlinganik iliortalerniarluni.

Atuarfimmiit kinguartitaanani imaluunniit anisitaanani meeqqat atuarfiat naammasserusullugu.

Qatanngutaa angajulleq 16-inik ukioqarluni meerartaarpoq. Meeqqani paarinngilaa perorsarnagulu.

Arne 12-it 13-it missaanik ukioqarluni aaliangersimavoq nammineq meerartaaruni ataataalluarusulluni.

Aaliangernerit assigiinngitsut inuusuttuaraanerani pisimapput, tamakkuuppullu inuuneranut ilusilersueqataasut allannguisullu.

Qatanngutai AFS-ernikuunngillat, taamaattumik nammineq AFS-erpoq Mexicomut ukioq ataaseq najugaqarluni. Spanskisut oqalunneq ilinniariaatigalugu.

Mexicomiinnermini maluginiarsimavai ilaqutarsiai imerajuttuunngitsut.

Tamanna sungiusimasimanngilaa.

Nammineq angajoqqaaminniit allaanerujussuarmik inuunillit inooqatigivai.

Anaanaminut allassimavoq ilaqutariit taamaattuni inuusinnaanani kalaallit nunaanut utertariaqarnerarluni imerajunngitsuniinneq sungiusimannginnamiuk.

Sungiusimanngeriaramiuk toqqissisimaffiginagu.

Angajoqqaavi qaqiffereernikuugaluartut kisianni inooriaaseq taanna inuunerisimavaat Arnellu tamanna “maqaasisimallugu”.

Anaanani taamatut allaffigigamiuk anaanaa akisimavoq inuunermini imerajuttuunngitsuni inuuneq misigisussaasimagamiuk taamaattunik ilaqutarsiaqartoq…

Anaanaa taamatut allammat “inisseriasaarsimavoq” taamaattussaasimasoq.

Aaliangerlunilu Mexicomiiginnarniarluni naammassinissaata tungaanut.

Aamma tamanna piviusunngortissimavaa.

2012-imi medie grafikeritut ilinnialerpoq.

Atuarnermini 2015-imi niviarsiaqqamik meerartaarput aappanilu.

2017-imi ilinniarnini naammassivaa niuni ajoqusernikuunera ukiumik ataatsimik kinguarsaatigigaluarlugu.

Arne allakkusunneranut tunngaviuvoq imerajuttukkormiuninngaanniit aniguilluni nammineq aqqutini nassaarisimammagu.

High-income skill ilinniarsimammagit.

Soorlu medie grafikerinngorluni filmiliortalerluni killuisalerlunilu videonik.

Imerajuttukkormiuninngaanniit qaqinikuunera ilanngukkusussimavara allanut iluaqutaasinnaammat.

Qaqinissamummi suminngaarneerfiit apeqqutaanngimmata.

Suminngaanniilluunniit qaqisoqarsinnaavoq.
Bill Gates oqarnikuuvoq:

“If you are born poor it’s not your fault. But if you die poor it’s your fault.”

“Piitsuullutit inunngoruit illit pisuussutiginngilat. Kisianni piitsuullutit toquguit illit pisuussutigivat.”

Atisanik mærkiliorluni Mala Johnsen-ilu Bolt Lamar pinngortinnikuuaat.

Arne imminut investeeriiffiginikuuvoq imissaarluni, pujortassaarluni inuuneq peqqinnartoq inuuffigineratigut.

Timersortalerlunilu.

Kingullermik 2019-imi imigassartorsimavoq.

2020-milu aappanilu ernertaarlutik.

Erneralu inuunera tamaat imernikuunngisaannarluni.

Imissaarneranullu tunngaviuvoq 30-iliilerluni ukiut 20-t imersimagami.

Kakkaak qulinik ukioqarluni imertalerami – 30-iliilerluni unilluni.

Ajunngeqaaq. Imminut investeeriiffigingaatsiaq inuunermut ajunnginnerusumut.

Taamaallutik toqqissisimasumik angerlarsimaffeqarlutik ilaqutariiullutik.

Suliffini 2022-imi qimappaa nuannarigaluarlugu, maannakkullu namminersortutut ingerlalluni.

Medie grafikkimik filmiliornermik killuinermillu Malalu suliaqarlutik.

Oqaatigivaa suliffikuminiit sulinikinnerulluni akissarsiakkaanerullunilu.

Tassa high-income skills luxooqutaat.

Kiffaanngissuseq.

Soraajaarusukkaanni meeqqat aajaarusukkaanni.

Nammineq naalagaalluni.

Tamakku anguneqarsinnaapput arlaannut kakkassigaanni.

Arne filmilioneq killuineq medie grafikkilu pikkoriffigineratigut taamatut kiffaanngissuseqarluni inoorujoorpoq.

Ullumikkullu qujamasuutigivaa atuisut akornaniissimagami…

Taamaasilluni maannakkut inuunini inuunerivaa.

Meeraalluni aaliangernikuunera ataataalluassalluni misigisimavaa atuuttoq…

Oqarpoq nammineq oqaatigisinnaanagu ataataalluartuulluni isumaqarami meeraata tamanna akisassarigaat.

Arnep eqqaavaa inuuneq allanngortinnissaanut kingusinaanngisaannartoq.

Aamma tamanna ilumoorpoq.

Oqaaseq una ilanngutilaarniarpara Earl Nightingaleminngaanniit: “Watch what everybody else does – do the opposite. The majority is always wrong.”

“Kikkut tamaasa iliuusai takukkit – akerlinganillu iliorlutit. Amerlanerussuteqartut kukkujuaannarput.”

Taanna instagramminnut ikkukkakku Arne uannut oqaasertaliivoq:

”Una texteq, uanga qatanngutimma cirkeliniit taamatut aninikuuvunga, ulloq manna tikillugu iluaqutigisannik, akerlinganik iliortarlunga.”

Isumassarsisimavungalu Arne-p oqaluttuaa ilanngunniarlugu.

Earl Nightingalep oqaasia ikkukkakku maleruutiinnartarneq pillugu allataqarninniit – Arne qaqivoq maleruutiinnarneq peeramiuk.

Nammineq aqqutini nassaarillugu.

Earl Nightingalep eqqartugaa torrattorujussuuvoq aamma akeqanngitsumik YouTubemi takuneqarsinnaavoq atilik:

The Strangest Secret by Earl Nightingale.

Tassani eqqartoramiuk maleruutiinnarneq sinnattunut toqutsisartoq.

Inuilli amerlanerussuteqartut maleruutiinnartuni akuullutik sinnattutik toquttoortarlugit – nammineq aqqutitik nassaarinngitsoorlugit.

SInnattutik angunngitsoorlugit maleruutiinnarneq pissutaalluni.

Aamma atuaganngorlugu pissarsiarineqarsinnaavoq immaqa quppernerit 40-t missaanniippoq – ulluinnarlugu atuarneqarsinnaasoq nalitooq.

Una allataq www.taatsi.com -imi atuarneqarsinnaavoq. Kammannut innersuukkusukku www.taatsi.com -imukaqquinnassavat.
​